Icyivugo cya Kigeli IV Rwabugili Inkatazakurekera

     Inkatazakurekera

Inkatazakurekera

ya rugombangogo

ndi intwari yabyirukiye gutsinda

singanirwa ndashaka kurwana.

5 Ubwo duteye abahunde

Nikoranye umuheto:

Nywuhimbajemo intanage

Intambara nyirema

Igihugu cy'umuhinza nakivogereye.

10 Umukinzi  ampingutse imbere n'isuli

Umurego wera nywuforana ishema.

Nywushinzemo ukuboko ntiwananira:

Nongeye kurega inkokora,

Nkanga umurindi hasi ndarekera.

15. Inkuba zesereza hejuru y'icondo:

Ikibatsi kiyicana mu rubega

Intoki zifashe igifunga zirashya!

Imisakura imucamo inkora

Inkongi iravuga mu gihengeli.

20 Mu gihumbi cye inkurazo zihacana inkwekwe

Inkuku yari afite ihinduka umuyonga ,

Agera hasi yakongotse:

Umubiri we uhinduka amakara

N'aho aguye arakobana.

25. Ni ukubiswe n'iyo hejuru,

Ababo batinya kumukora,

Bati: ``ubwo yanyagiwe n'inkotanyi-cyane

Nimumureke mwe kumukurura

Ibisiga bimukembere aho!"

30. Na byo bimurara inkera;

Bimaze gusinda inkaba

Byirirwa bisingiza uwantanagiye.

Iki cyivugo cyavanywe mu gitabo `Un Abrege Sur l’Hetno-Histoire du Rwanda cyanditswe na Alexis Kagame.